Kulan Kubadda kolayga oo dhex maray dhalinyarada ku dhaqan dalka U.K.
Kulan kubadda kolayga ah oo aad u qiimo badnaa ayaa uu dhexmaray laba kooxood oo
dhalin yaro da’doodu u dhaxaysay 16 ilaa iyo 19 sano jir, kuwaas oo ka kala socday
magaalooyinka Leicester iyo London.
Kulankan ayaa waxaa soo abaabulay maamulka dhalinta cuslaatay ee kubadda kolayga
deegaankoodu yahay London oo la kaashaday dhigooda ku dhaqan magaalada Leicester.
Ulajeedada tartanka ayaa wuxuu ahaa in la helaa dhalinyaro da’yar oo mustaqbalka
meteli karta Qaranka Soomaaliyeed. Shirar is daba jog ah oo ay bahda kubadda kolayga
dhawaanahanba wadeen ayay waxay is tuseen in ay lagama maarmaan tahay in da’yartan
laga shaqeeyo sidii meel layskugu keeni lahaa, looguna abaabuli lahaa tartamo kubadda
kolayga ah.
Dhalintan ayaa ku kala firirsan dhamaan daafaha dalka U.K. Waxaa qorshuhu yahay
in kulankan dabadiis loo qabtaa mid ay dhamaan ka soo qayb galaan magaalooyinka
kale oo ilaa iyo hadda la hubo sida: Birmingham, Manchester, Cardiff iyo Liverpool.
Waloow gacmo furan lagu soo dhawayn doono hadii ay jiraan magaalooyin kale oo haya
dhalin yaro diyaar ah oo leh xirfadda kubadda kolayga.
Hadaan u soo laabto kulankii maalintii Axadda dhexmaray labadda kooxood ee London
iyo Leicester, ayaa ahaa kulan aad u qiimo badnaa oo ay labadan kooxoodba soo bandhigeen
xirfado aad u heer sareeyay, kaas oo ku bilowday dar dar weerar iyo weerar celis
ah kaas oo 1st quarter-kii ugu horeeyay lagu kala nastay kooxda London oo lahayd
19 halaka kooxda Leicester ay ka keen satay 18 dhibcood.
Nasasho gaaban dabadeed ayaa laysku soo laabtay weerarkii meeshiisii ayuu ka bilowday
waxaadna mooday in labadda kooxoodba ay ka soo faa’iidaysteen la tashigii macalimiintooda
waxaadna mooday in kooxba kooxda kale ay fahantay qaab ciyaareedkeeda waxayna isla
dhaafi waayeen 2nd quarter-kii in kooxda London ay hadan hogaanka ku hanato 32 dhibcood
halaka kooxda Leicester ay ka keen satay 30 dhibcood.
Waxaa la maray nasashadii Half term-kii, kooxuhu waxay mar kale fursad u heleen
in ay la tashi fiican la yeeshaan macalimiin toodii. Kooxda Leicester oo ku ciyaaraysay
funaanadaha ay ku qornaayeen ILAMOS ayaa waxaa macalin u ahaa Siyaad Dahir oo uu
wehlinayay macalin Mire, waxaana ka muuqatay xamaasad guubaabin iyo dhiiri gelin
ku jirtay.
Ciyaarta ayaa waxaa Siiri wadayaal ka ahaa macalin John iyo Axmed Bile halka uu
qorista iskoorka ama miiska u fadhiyay Mohamed Sheikh Abdi. Ciyaartii ayaa dib u
bilaabatay waxaad mooday in labada kooxba si fiican u difaacayeen ciyaar yahanada
kooxda kale ay is leeyihiin xirfadoodu waa saraysaa. Waxaan ka xusi karaa kooxda
Leicester laacibka numbarka 23 u sitay ee lagu magacaabo C/kariin Abdi oo runtii
ahaa cayaar yahan da’yar oo mustaqbal fiican leh iyo cayaaryahanka lambarka 13aad
u watay Abdi Shakuur oo isna ahaa kubad qaybiye aad ay uga muuqatay kalsooni. Cayaarta
qaybtan ayaa waxaa lagu kala nastay barbar dhac kooxda London 42 dhibcood kooxda
Leicester-na 42 dhibcood.
Waxaa la galay qaybtii ugu danbaysay oo lagu kala baxayay, waxaad mooday in kooxda
Leicester ay jiifteen ama in uu daalkii safarka ka soo baxay waxaa lagu qaaday weerar
cir iyo dhul ah kaas oo looga dhaliyay ilaa iyo shan tuurashada sedexda dhibcood
ah waxayna noqotay in ay ka niyad jabaan in ay tiigsadaan soo qabashada kooxdii
London. Cayaartooyda aan ka xusi karo kooxdii London ayaa waxaa ugu cad cadaa wiil
uu dhalay Biriq oo lagu magacaabo Cali oo watay numbarka 9 aad oo runtii ahaa xidigii
cayaarta maalinkaas MPV. Waxaa kaloo kooxda London ayagana aan dab yar dhigin Elmi
oo isna ahaa ninkii ugu goolasha badnaa tartanka oo dhaliyay 22 dhibcood kaligiis,
waxaa kaloo isna dhexda ka xamaalanayay wiil watay numbarka 03 oo lagu magacaabo
Omer, oo isna ahaa wiil dheer oo xoog u sheeganayay dhalin yaradii kale xagga rebound-ka.
Waxayna cayaartii ku idlaatay 69 dhibcood oo ay guushii ku hanteen kooxdii London
halka kooxda Leicester ay dhaafi wayday 49 dhibcood.
Runtii kulanku wuxuu ahaa mid aad u xiiso badnaa ayna aad ugu riyaaqeen daawadayaashii
ka soo qayb galay tartanka, kuwaas oo codsaday in tartanka noocaan oo kale ah la
joogteeyo si ay uga faa’iidaystaan dhalinyaradan da’da yare e aan helin fursado
noocaan oo kale ah.
Ciyaarta kadib ayaa waxaa loo dareersaday goobtii soo dhawaynta iyo cashada maqaayad
ku tiil Church road ee xaafada Willesden,taas oo loogu tala galay kooxdii Leicester.
Kooxdii Leicester iyo macalinkoodii ayaa aad uga mahad celiyay fursadan qaaliga
ah oo ay walaalahood London siiyeen in ay ku soo dhaweeyaan cayaar hadana casho
sharaf ku sii sagootiyaan. Waxayna balan qaadeen in ayagan markooda mid saan la
mid ah ay ku samayn doonaan magaaladooda Leicester haduu Alle idmo.
Maxamed Sheikh Abdi (weli) oo ah xubin ka mid ah xiriirka kubadda kolayga Soomaaliyeed
kana mid ahaa odayaashii soo qaban qaabiyay tartankan ayaa runtii asna u mahad celiayay
dhamaan maamulka iyo macalimiinta labada dhinac iyo cayaartooydooda. Waxaana aad
ugu farxay ayuu yiri "sida is dhaxgalka dhalaankan iyo sida ay isku dhaafsiisanayeen
aqoon is waydaarsiga xaga luqada Soomaaliga ah iyo wax yaabo magaca soomaaliga ah
lagu dhaho oo aad mooday in ay ku adkeed qaarkood in ay sheegaan balse qaar kale
sheegayeen. Dhalintan ayaa ka soo kala jeeday koonfurta iyo waqooyiga soomaaliya
taas oo aad mooday in ay ku kala duwanaayeen sida ay lahjad ahaan ugu kala dhawaaqayeen."
Wuxuu kaloo si qaas ah ugu mahad celiyay macalinka iyo macalin ku xigeenka kooxda
reer Leicester oo runtii muujiyay ciyaar wanaag. Sidoo kale wuxuu iyana u mahadceliyay
asxaabtiisa kale ee reer London ee waqtigooda qaaliga ah u huray in ay suuro gasho
in tartankan uu u dhaco sidii ay u qorsheeyeen.
W/Q: xafiiska Kubadda.com