Kooxda Heegan oo Hanatay Horyaalkii 13aad ee Kubadda Gacanta
Garoonka 1da Luulyo (Ex-Lugino) ee Magaalada Muqdisho ayaa ciyaartii kama dambeysta
Horyaalka 13aad ee Kubadda Gacanta waxaa isku haleelay wiilasha Heegan iyo Dekedda,
waxaana markii shanaad ee isku xiga koobka gacanta ku dhigay kooxda Heegan oo 17-15
ugu awood sheegatay kooxda Dekedda.
Labadan Kooxood ee Heegan iyo Dekedda ayaa ah labada kooxood ee ugu awoodda weyn
dhanka Kubadda Gacanta dalkeena waxaa ka dhaxeeya xafiiltan ciyaareed aad u heer
sareeya, waxaana muuqanaysa markii ay kulmayaan inay ciyaarayaan kulan xirfad iyo
xamaasad badan.
QAABKA CIYAARTA
Qeybihii ugu horeeyay Kooxda Dekedda waxay la soo baxday ciyaar farsamo leh waxaana
muuqanaysay inay goolasha ku hormarayaan halka Heegan ay mar walba barbardhaca ay
ku dadaalaysay, Laakiin waxay xaajada is bedeshay markuu garoonka soo galay ciyaaryahanka
ay ku dhaartaan Heegan Cali Baraawiini oo goolal deg deg ah shabaqa Dekedda dhex
dhigay sidaasna ugu sahlay inay hogaanka ciyaarta ay la wareegto Heegan, waxaana
xusid mudan in fursado qaali ah oo soo maray Dekedda ay iska lumiyeen kuwaas oo
u badnaa rigoore (penalty). guud ahaan ciyaartan xiisaha lahayd ayaa 17-15 ku soo
gabagabowday.
Waxaa ciyaartan garsoorayay C/laahi Xasan Cali {Kuusoow} iyo Maxamed Cusmaan Xaaji
(Galeey), Dhibcaha waxaa qorayay Nuur Rooso. iyadoo Sacaadda uu hayay Maxamed Dheere.
Gabagabadii waxaa halkaasi lagu bixiyay Abaalmarino Koobab iyo Bilado ah kooxihii
galay kaalimaha ugu horeeyay oo ay xaqiijiyeen kooxaha Heegan, Dekedda iyo Horseed.
Daawashada ciyaarta waxaa ka soo qeybgalay mas`uuliyiin kala duwan sida Duqa Magaalada
Muqdisho ahna Guddoomiyaha Gobolka Banaadir Maxamuud Axmed Nuur (Tarzan), Agaasimaha
guud wasaaradda Horumarinta Adeegga Bulshada Aweys Sheekh Xadaad, ku simaha Guddoomiyaha
GOS Axmed Cabdi Xasan {Wataac}, Xoghayaha GOS Duraan Axmed Faarax, Guddoomiyaha
XSKG Maxamed Xasan Xuurshe [Eenoow], Guddoomiyaha XSKK Ibraahim Xuseen Cali [Roombo],
Guddoomiyeyaasha degmooyinka C/Casiis iyo Xamar Jajab C/laahi Xuseen Xasan iyo Maxamed
Cali Axmed, Guddoomiyaha NGSC C/qani C/llaahi Hilowle (C/qani Jeenyo), laacibkii
hore ee kooxda Batroolka iyo Qaranka Soomaaliyeed Ahmed Muuse iyo marti sharaf iyo
taageerayaal aad u farabadan.
Said Ibrahim Hussein (BUUNA)